LOUIS CUSCHIERI
Twieled il-Kalkara fil-5 ta’ Jannar 1947. Wara kors fil-fotografija, fl-1975, daħal jaħdem mal-Gvern bħala fotografu professjonali mad-Dipartiment tal-Informazzjoni u rtira fl-2002.
Beda l-karriera artistika tiegħu ta’ 15-il sena billi kien jirreċta u jkanta mal-kumpanija teatrali Samaritans Dramatic Company. Wara erba’ snin sar wieħed mill-atturi ewlenin tal-kumpanija teatrali Bajda u Ħamra, imwaqqfa fis-sittinijiet. Wara sar wieħed mill-atturi ewlenin tal-kumpanija D.C.A. Productions. Għandu l-unur jgħid li għall-ewwel darba fuq il-palk Malti deher fil-karattru ta’ cowboy fid-dramm western u kien interpreta l-parti prinċipali. Id-dramm kien intitolat ‘Anacleto’, dramm maqlub għall-Malti mill-film The Singer not the Song.
Louis kien ħabib kbir tal-mibki Paul Avellino, General Manager tal-Malta Film Facilities, illum Mediterranean Film Studios. Fl-1964 inħadem Malta l-film Bedford Incident. Avellino daħħal lil Louis bħala parti mill-crew, għax kien jaf li jippossiedi talent kbir. Wara dan il-film serva anke bħala First u anke Second Assistant Director u diversi karigi oħra. Fost il-films fejn ta s-servizzi tiegħu nsibu: A Twist of Sand, Eyewitness, Brothers, Pulp, The Mackintosh Man, Zeppelin, The Land That Time Forgot, Hellbout, Shout at the Devil u Sinbad and the Eye of the Tiger. Louis sar ħabib sew tad-diretturi tal-films imsemmija. Fosthom insibu lil John Huston: The Mackintosh Man, Don Chaffey: A Twist of Sand, Mike Hodges: Pulp, Kevin Connor: The Land That Time Forgot, Paul Wendkos: Hell Boat, Sam Wanamaker: Sinbad and the Eye of the Tiger, Peter Hunt: Shout at the Devil, Etienne Perier: Zeppelin u lill-producer Michael Klinger li hawn Malta pproduċa: Pulp u Shout at The Devil. Dawn indunaw li Louis jippossiedi talent u inklinazzjoni kbira għad-direzzjoni u għall-kitba ċinematografika. Meta kienu jarawh jieħu daqshekk interess, kienu jagħmlu minn kollox biex jgħallmuh dak kollu li jistgħu. B’hekk akkwista esperjenza kbira.
Louis attenda kors fuq il-kitba Letterarja u Drammatika Maltija, immexxi mill-mibkija l-Prof. Ġużè Aquilina u Ġużè Diacono. Fl-istess żmien Louis u xi ħbieb tiegħu ffurmaw il-kumpanija Sunrise Pictures bi skop li jipproduċu l-films. Minn hawn Louis beda l-karriera ta’ Screenwriter/Director. Huwa u sħabu bdew jiproduċu films miġbuda fuq 8mm u Super 8mm. Kienu juru dawn il-films fis-sala tal-iskola tal-Kalkara u jorganizzaw għal kull film li jipproduċu Best Actor Award Premiere Night. Il-Kalkariżi kienu jattendu bi ħġarhom biex jaraw it-talenti ta’ ħuthom il-Maltin. F’dawn il Best Actor Award Premiere Nights kienu jistiednu bħala host lill-attriċi Ingliża Jean Kent u bħala ġurija kienu jistiednu lill-awturi ta’ fama internazzjonali bħal Ernie Bradford, Hugh Atkinson u Jim Maitland. Magħhom kien ikun hemm persuni distinti Maltin bħal Charles Clews u Charles Flores.
Ftit taż-żmien wara, Louis kiteb u dderieġa IŻ-ŻONQRI, l-ewwel Video Film Malti li kien għall-kiri u bejgħ fil-ħwienet tal-Video Rentals ta’ Malta u Ghawdex. Tant għamel suċċess li meta kont tmur biex tikrih kont issibu dejjem mikri. Kien ikollok tibbukkjah biex meta jasal iċ-ċans tiegħek tkun tista’ tikrih.
Biex isaħħaħ il-potenzjal tiegħu ħa kors ieħor fl-Università ta’ Malta dwar kitba kreattiva, immexxi mill-Prof. Oliver Friġġieri u żewġ korsijiet oħra minn fuq l-Internet: “What is a Film Director?” u “How to Right a Screenplay”.
Louis kiteb, ipproduċa u dderieġa l-film għaċ-ċinema ‘Mera tal-Passat’ li għall-ewwel darba bħala produzzjoni Maltija kien intwera fl-Eden Century Film Centre u Sun City Cine Palais. Meta ntwera fuq l-S.B.S. TV Station fl-Awstralja, intlaqa’ tajjeb ħafna mill-emigranti Maltin.
L-aħħar film li kiteb u dderieġ għaċ-ċinema huwa QERQ (fl-2005). Ħareġ għall-wiri fiċ-ċinemas ta’ Malta u Għawdex fit-30 ta’ Jannar, 2007 u kiser kull rekord fil-box office Maltija. Baqa’ jżomm l-ewwel post għal sitt ġimgħat u dam jintwera fiċ-ċinemas Maltin għal erba’ xhur sħaħ, rekord assolut.
Wara s-suċċess tal-film, Louis iddeċieda li l-iscreenplay tal-film QERQ joħroġ bħala ktieb. Il-ktieb QERQ ġie ppubblikat minn Wise Owl Publications fl-2008.
Lista ta’ stejjer u screenplays li kiteb Louis Cuschieri. (Id-data fejn kull screenplay juri s-sena ta’ meta tlesta mill-kitba mhux mill-ġbid. Parti mill-iscreenplays inkitbu biss u ma nġibdux films.)